මාර්ග ආරක්ෂාව පිළිබඳ ජාතික සභාවේ ක්‍රියාකාරී සැලැස්මෙහි ක්‍රියාකාරකම් 17 යටතේ දක්වා ඇති “අධ්‍යාපන අමාත්‍යාංශය සමග එක් ව පාසල් සිසුන් වෙත මාර්ග ආරක්ෂාව පිළිබඳ දැනුවත් කිරීමට අදාළව ක්‍රියාමාර්ග ගැනීම” යටතේ සිදු කිරීමට නියමිත, 6-11 ශ්‍රේණින්ට අයත් විද්‍යා හා ගණිත විෂය නිර්දේශයට, ගුරු අත්පොතට හා පෙළ පොතට මාර්ග අනතුරු සඳහා පසුබිම් වන සෛද්ධාන්තික දැනුම ඇතුලත් කිරීමට සඳහා විශේෂඥ දැනුමැති නිලධාරීන් සම්බන්ධ කර ගනිමින් 2023.10.10 හා 11 යන දෙදින වැඩමුළුවක් බත්තරමුල්ල ඉදිකිරිම් යන්ත්‍රපෝකරණ පුහුණු ආයතනය තුල පැවැත්වීමට සිදු කරන ලදි.
මාර්ග ආරක්ෂාව සම්බන්ධයෙන් මාධ්‍යවේදීන් දැනුවත් කිරීමේ වැඩමුළුව 2023.09.27 දින ශ්‍රී ලංකා පදනම් ආයතනයේදී පවත්වන ලදි.මේ සඳහා ප්‍රධාන ආරධිත අමුත්තා ලෙස සහභාගි වුයේ ගරු ප්‍රවාහන රාජ්‍ය අමාත්‍ය ලසන්ත අලගියවන්න මැතිතුමා වන අතර මෙහිදි රාජ්‍ය හා පෞද්ගලික ආයතනවල මාධ්‍යවේදීන් රුසකගේ සහභාගිත්වයෙන් පෙ.ව 9.00 ට ආරම්භ කෙරිනි. මෙහි මුල්ම දේශනය පැවත්වුයේ ශ්‍රී ලංකා වෛද්‍ය සංගමයයේ සමාජීක හා පේරාදේනි විශ්ව විද්‍යාල මහාචාර්ය සමත් ධර්මරත්න මහතා විසිනි. මෙම දේශනය තුලදි “සීඝ්‍රයෙන් ඉහළ යන මාර්ග අනතුරු” පිළිබඳව මාධ්‍යවේදී හිතවතුන් දැනුවත් කිරිම සිදු වුනි. ඉන් පසු අනෙකුත් සම්පත්දායක මහත්වරුන් පිළිවලින් “සුරක්ෂිත මාර්ග පද්ධතියක් උදෙසා මාර්ග සංවර්ධන අධිකාරියේ කාර්යභාරය ” පිළිබඳ දේශනය නියෝජ්‍ය අධ්‍යක්ෂ(යටිතල පහසුකම් සංවර්ධන හා මාර්ග ආරක්ෂා කළමනාකරණය)මාර්ග සංවර්ධන අධිකාරිය කේ.චන්ද්‍රකුමාර මහතා විසින්ද, “රථවාහන නීතියේ මෑතකාළීන සංශෝධන හා ඉදිරි නෛතික ක්‍රියාමාර්ග” පිළිබඳ දේශනය මෝටර් රථ ප්‍රවාහන දෙපාර්තමේන්තුවේ නිතී නිලධාරි කේ.අයි.යෝගචන්ද්‍ර මහතා විසින්ද, “පසු අනතුරු කළමනාකරණය” පිළිබඳ දේශනය - සෞඛ්‍ය අමාත්‍යාංශයේ ප්‍රජා වෛද්‍ය විශේෂඥ වෛද්‍ය සමිත සිරිතුංග මහතා විසින්ද, “මාර්ග අනතුරු නිවාරණ හා දත්ත විශ්ලේෂණය” පිළිබඳ දේශනය රථවාහන පොලිස් මූලස්ථානයේ නියෝජ්‍ය පොලිස්පති එච්.ඒ.කේ.ඒ.ඉන්දික හපුගොඩ මහතා විසින්ද සිදු කරන ලදි.අවසානයේදි ඉදිරියේදි මාර්ග ආරක්ෂාව පිළිබඳ ජාතික සභාව විසින් කිරිමට නියමිත වැඩසටහන් පිළිබඳව මාර්ග ආරක්ෂාව පිළිබඳ ජාතික සභාවේ සභාපති මලිත් ජයතිලක මහතා,මාධ්‍යවේදීන් දැනුවත් කිරිම සිදුවුනි.
හොරණ - කොළඹ ප්‍රධාන මාර්ගයේ මාරක රිය අනතුරු බහුල ස්ථානයක් ලෙස හඳුනා ගෙන ඇති රිලාවල මංසන්ධියේ අනතුරු අවම කිරීම සඳහා වන දැනුවත් කිරීමේ පුවරු, මාර්ග ආරක්ෂාව පිළිබඳ ජාතික සභාවේ මූලිකත්වයෙන් ස්ථාපිත කිරීමට කටයුතු සිදු කර ඇත.
